الانسان و الكمبيوتر .... متشابهات

اثناء عملي على الحاسب الالي شرد ذهني الى التشابه الكبير بين الكمبيوتر و الانسان و طبعا دا ممكن نعزيه لي سبب بسيط و هو انه الانسان هو من صمم و صنع الحاسب الالي او الكمبيوتر فاستوحى فيه من صفاته الانسانية و اصبح الكمبيوتر الى حد ما تجسيد للتجربة الانسانية في العيش و التفكير و اتخاذ القرار.

الحاجة دي ممكن نشوفها بوضوح في التشابه الحاصل على مستوى الذاكرة ، ذاكرة الكمبيوتر مثلا تتكون من ذاكرة موقتة او قصيرة (RAM) و ذاكرة ممكن نحفظ فيها معلومات لمدة طويلة مثل الهاردسك و ذاكرة شبه دائمة زي (ROM) و دا تجسيد كبير لينا و لي ذاكرتنا بحيث نحن عندنا انواع من الذاكرة منها قصيرة المدى و دي غالبا بتتحفظ فيها الحاجات الانحنا او بالاصح المخ بعتبرها غير مهمة و دي مثال عليها الاحلام مثلا البنصحى نلقى روحنا ناسنها او كلام كتير في ونستنا اليومية و عندنا حاجات بتتحفظ في الذاكرة الطويلة زي المهارات (طريقة لعب حاجة معينة) او الحاجات البنعملها باستمرار وفي الذاكرة الدائمة الي هي حاجات المخ حافظ انه يعملها من غير تدخل مننا زي كيف بنتنفس اثناء النوم (او كيف بنتنفس عموما) . طبعا الاختلاف الكبير قد يكون في السهولة البنقدر ننقل بيها البيانات من الذاكرة الموقتة للذاكرة الطويلة و دي حاجة ساهلة نسبيا بالنسبة للكمبيوتر لكن بالنسبة للانسان صعب وبحصل في حالات منها انه الحدث يكون مميز او اثره كبير علينا او سبب لينا صدمه او في حالة التكرار الدائم او شبه الدائم للحدث (و طبعا دي بتختلف باختلاف البشر و القدرة الحباهم بيها ربنا على التذكر).

لكن من الحاجات الانا بجدها غريبة التشابه "النفسي" بين الانسان و الكمبيوتر (مع الاخذ بالاعتبار انه الكمبيوتر هو فقط الة ولا يملك روح). القصد انه من خلال التعامل المستمر مع الكمبيوتر انت بتقدر تقيم حالته كذلك الانسان بالمعاشرة و التواصل بنقدر نقيم حالتة النفسية. من الملاحظات بتاعتي مثلا انه الكمبيوتر مرات بعد فترة ببدا يعلق ويبقى بطئ وبتبدا كفاءته تقل و دا في الحقيقة ما مرض دا واحد من الاعراض للمرض الي هو قد يكون مثلا البرامج البتشتغل معا بداية تشغيل الكمبيوتر (start-up program) كتيرة ف بتخلي الكمبيوتر مثلا ما يقدر يعمل بي كفاءة عالية لانه بعالج في كذا برنامج في نفس الوقت. دا بشبه جدا حالة الانسان البعاني من مشكلة التفكير الزائد (overthinking) و بتلقاهو بفكر كتير و بفكر اكتر من اللازم و مخه دائما مشغول و دا بخلي الانتاجية تقل و كل ما كان في تشتت ذهني كلما قل اداءه و دا تشابه انا بجده غريب و دا بدعوني للتسأل انه هل الحاجة دي حصلت بالصدفة ولا كانت مقصودة من المخترعين الاوائل ولا لانه مخنا بشتغل بالطريقة دي ف برمجنا الالة انها تشتغل زينا و تاخد حتى من عيوبنا !!.

مرات برضو الكمبيوتر بديك errors  غريبة ما بنقدر نحدد مصدرها بي سهولة، حتى مرات الخطأ بكون ماف سبب ظاهر ليهو، يعني ظاهريا كل حاجه كويسة و مفروض الكمبيوتر يقدر يعمل معالجة للبرنامج من غير مشاكل يلا دا غالبا بكون من اعراض حاجة خفية حاصلة داخليا زي انه مثلا امكانيات الجهاز دا ما بتمكنك انه تشغل البرنامج دا و الحاجه دي بتشبه لينا تغير سلوك الانسان نتيجة للضغط العصبي العايشه بي سبب انه ما قادر يكون قدر التوقعات الموضوعه ليهو من الحوليهوا سواء كان توقعات نجاح او توقعات شكل عيشة معينة  و ضغوطات مطالبة بي حاجات قد تكون اكبر من امكانياته و هنا الانسان بطلع الحاجات دي في شكل افعال نحن ما عارفنها حصلت كيف وانه الشخص بقى عصبي،ما بتناقش، بركب راس، او في شي ما طبيعي في شخصيته.

الكمبيوتر لمن يصاب بفيروس بتبدا تتغير طريقة شغله و ببدا يعمل في اوامر خارجة عن ارادتك زي مسح فايلات او تغيير اسمها او اتلاف لي محتواها دا برضو بشبه لينا حالة الانسان المصاب بي مرض نفسي و انه  كيف ممكن يتغير في سلوكه ويصبح عدواني مثلا او يتصرف بي حدة غير مبررة و دي كلها اعراض لي حاجة جوا محتاجين نتفحصها و نتحلى بالصبر لغاية ما نلقاها و نتغلب عليها وما دايما المرض النفسي بكون عندو سبب ظاهر في السطح.

  العايز اقولوا انه بي نفس درجة تفهمنا انه الكمبيوتر ممكن ما يشتغل كويس و اجتهادنا انه نبحث عن مواطن الخلل و نحاول نحلها مفروض برضو نكون صبورين معا الناس الحولنا البعانوا من الالم النفسي بدرجة او باخرى و نحاول نهون عليهم و نساعدهم و ما نقنع منهم و نبعدهم على امل انه زي ما بنقدر نعالج مشاكل الكمبيوتر نقدر في يوم نحل مشاكل الحولنا.

حاجة اخيرة انه زي ما مرات مشاكل الكمبيوتر بتكون عويصة لي درجة بتحتاج تدخل فني فالمشاكل النفسية لمن تصل نقطة معينة بتتطلب تدخل متخصصين و ما مفروض نخجل من طلب المساعدة متى ما استدعت الضرورة.

انا هنا قارنت الانسان بالكمبيوتر و دي قد تكون مقارنة مجحفة في حقنا كبشر لانه نحن اكبر و اعمق و اكثر عقدة من مجرد الة، بس الكمبيوتر دا في النهاية هو نتاج لي خيالنا ، نتاج لافكارنا ، نتاج لمعرفتنا ، نتاج لي طرق حلنا للمشكلات و بعتبر انه الكمبيوتر هو عبارة عن تجسيد مجرد لينا و من خلال فهم اعمق ليهو ممكن نفهم أنفسنا و الحولنا اكتر.